سمعتوا اخر الاخبار ؟؟؟؟؟؟
قال ايه الكهربه حتبقى بكروت شحن زى الموبيل
هو احنا ملاحقين على اللى معانا..
يعنى تشحن وبعدين تنور وكهربتك على اد فلوسك بقى يعنى مثلا كارت ال100 جنيه يديك كهربه 3 شهور وشهر سماح وفى شهر السماح ده تقدر بس تنور الكهربا
بس متقدرش تطفيها يعنى تستقبل بس
واكيد كمان حتكون فى انظمه يعنى مثلا نظام كهربه اكتر وده يحاسبك اللمبتين بسعر لمبه واحده ونظام مده اطول وده يزودلك فتره الشحن مقابل انكمتشغلش التلفزيون مثلا .. بس انا محتاره مش عارفه نظام الميسدات حيكون ازاى؟
يعنى ممكن لو عايز تعرف مكان حاجه فى الاوض تنور اللمبه وتطفيها فى ثانيه وبكده متتحسبش عليك بفلوس .. فكره برضه
واكيد برضوا حيكون فى فئات للكروت يعنى لو مزنوق ممكن تشحن كارت ب25 ولو مزنوق اوى وعايز تتفرج على فيلم ولا مباراه هات كارت 10 جنيه يمشيلك الليله
وحتطلع بقى شركات للكهربه زى الكترونيل وفودانور وحيتنافسوا على الشعارات الكترونيل مثلا حتبقى نور من القلب
وفودانور مش بس اضاءه
ولو على الخدمات حتلاقى فودانور اشد اضاءه فى العالم
والكترونيل حننورلك فين متكون
واكيد كمان فى فترات الضغط الشبكات حتقع ونقضيها على ضوء الشموع واكيد حيكون فى مناطق التغطيه فيها ضعيفه
بس اكيد اننا كده حنرتاح من المنظر الكئيب بتاع محصل الفاتوره اللى دايما يجيى فى وقت مش مناسب
وحتكون كهربتك بايدك يعنى من الاخر
نور واتحكم
بس يا سلام لو حد قاعد فى الحمام بقى واللمبه قالتله عفوا,,,,,,,,,,,,,,,, لقد نفذ رصيدكم
برجاء اعاده شحن اللمبه
موضوع: الكهربه حتبقى بكروت شحن 
