رقم صحيح مش كسرعشرى ـ تأوهات عذراء

تأوهات عذراء

رقم صحيح مش كسر عشري

كل القيود على البنت عشان هي بنت مش ولد
كل الخطوط الحمرة والبرتقالي بتترسم قدامها عشان هي بنت مش ولد و القهر
والاستبداد في أنقى صورهم بيمارسوا عليها عشان هي بنت مش ولد، كل التحكمات
والقرارات والطلبات اللي ملهاش أي لازمة تبقى في تجدد مستمر عمرها ما
تنتهي ولا بتقف عشان المأسوف على شبابها بنت مش ولد، و يا ويلها و سواد
ليلها لو قررت أو فكرت تعترض أو تناقش أي قرار... تناقش إزاي دي بنت مش
ولد.
البنت ماتخرجش من البيت مع صحباتها إلا لما تاخد إذن باباها قبلها بكام
يوم لو قالتله في نفس اليوم انها عايزة تخرج تبقى وحشة وبتاخد قراراتها من
دماغها وبتحطه قدام أمر واقع اللي هو في النهاية مش هتخرج عارفين ليه؟؟؟
علشان هي بنت مش ولد!! لو ولد كانت خرجت و من غير إذن و سهرت كمان.
الأب بيرفض إن البنت تدخل السينما لوحدها مع صاحباتها البنات ولازم يبقى
معاها راجل اللي هو غالباً بيبقى أخوها البطل، عارفين ليه؟؟ علشان هي بنت
مش ولد.
و لا التليفون بقى البنت لما بيجيلها تليفون و تحاول تنقل التليفون في أوضة غير اللي فيها باباها عشان تتكلم بيحصل السيناريو الآتي:
الأب: واخدة التليفون ورايحة على فين يا بنت؟؟
المأسوف على شبابها: هتكلم جوه في الأوضة.
الأب: ليه هتقولي إيه و مش عايزاني أسمعه؟؟
المأسوف على شبابها: مفيش يا بابا صدقني.
الأب: خلاص يبقى تتكلمي هنا.
عارفين ليه بيحصل السيناريو الرائع ده؟؟
علشان الغلبانة بنت مش ولد.
لو كانت ولد كان خد التليفون والأب كله زهو إن إبنه بيتكلم في التليفون
وياريت يكون بيكلم واحدة عشان يبقى الواد مقطع السمكة وديلها و يا سلام لو
المقهورة اتهفت في عقلها وزعلت أخوها أو قالت له كلمة كده و لا كده وجرحت
مشاعره المرهفة تسمع بقى أحلى كلام،....أخوكي الراجل ...الولد كلامه يتسمع
...هو اللي عارف مصلحتك...هو اللي كلمته تمشي و لو مامشيتش انتي اللي مش
هيبقى عندك حتى بقايا رجلين تمشي عليها واكسر للبنت ضلع يطلعلها 24. هما
الرجالة دول معجزة!! ومفيش زيهم و البنات هما الجواري الخدامات اللي
اتختمت شهادة ذلهم يوم طلوع شهادة ميلادهم وللأسف كل محاولاتهم لتقطيع
الشهادة دي انتهت بالفشل.
ممكن تقولوا علي متحاملة شوية أو كلامي فيه إفتعال بس كل ده بيحصل وباشوفه
بعيني. هو صحيح الأب بيحب ولاده زي بعض وبيتصرف كده وهو فاكر إن القيود
اللي فارضها على بنته دي هتحميها بس وهو بيعمل كده مابيديش نفسه فرصة يفكر
أد ايه تصرفاته دي بتأثر على نفسيتها وبتحطم شخصيتها، و بتخلق فيها ثورة
على كل حاجة في حياتها، وبتخليها تتمنى و تستنى اليوم اللي تسيب فيه بيت
أهلها سواء وهي حية ترزق فتروح لبيت جوزها اللي غالباً مش هيختلف عن بيت
أبوها كتير، أو ميتة فتروح عند ربنا العادل اللي محدش حاسس بيها قده، و يا
سلام بقى لو المأسوف على شبابها ماتجوزتش .... مبتخلصش كلام من الناس
والجيران و محدش بيسيبها في حالها، .... الناس بتبص للست كأنها كسر عشري و
لازم يبقى معاها راجل عشان تكون رقم صحيح، بس أنا بقى من هنا بقول إحنا
رقم صحيح مش كسر عشري، وبقول كمان البنت زي الولد ماهيش كمالة عدد وتقدر
توهب وتعطي وتخدم ولادها ومجتمعها وبلدها زي .الراجل بالظبط وعلى فكرة ده
مش رأيي لوحدي في بنات كتير موافقيني على الكلام ده

منقول من موقع الكتيبة الطيبية

موضوع جميل وانا بقيد رايك

وربنا معانا ويعنا بقى ونروح الى حاسس بينا واتكالننا علية

ميرسى سالى وربنا موجود معانا

ميرسى نانا لمشاركتك
منتظرة اراء باقى الاعضاء

فين ده قوليلى فين انا دخت ومش لاقى كده
دورت تحت السرير مافيش فى الدولاب مافيش
اقعدت ادور على مكان بيحصل فيه كده فى البنت اليومين دول مش لاقى
دول واخدين حقهم دلوقتى اكتر مننا
الكلام ده كان زمان بس دلوقتى لا وبجد ده مش تعصب بس ده اللى بشوفه
ميرسى على الموضوع وياريت تقبلى مرورى
ربنا يبركك

ههههههههههههههههههههههههههههههههههههههههههههه

انت مشكلة دور بذمة هتلاقى بس انت الى مش عايز تشوف عشان انت ولد مش بنت

ميرسى لمروركم
اكيد مش هتلاقى طالما بتدور فى الدولاب وتحت السرير
ادخل العشوائيات هتلاقى كتير

كل الخطوط الحمرة والبرتقالي بتترسم قدامها عشان هي بنت مش ولد
ميرسي على الموضوع بس مش كل الكلام صح
انا معاكى ان فى بنات بيحصلها كده بس مش الكل ودلوقتى فعلا البنت واخده حريتها بس مش زى الولد طبعا
بس على الاقل احسن من زمان
ميرسى كمان مره على الموضوع

بس على فكره احنا مش واخدين حقنا اكتر منكم
يعنى مثلا مينفعش ارجع من بره الساعه 1 او 2 انتوا طبعا عادى جداااااااا تتاخروا براحتكم
وفى حاجات كتير

ميرسى لمروركم ومشاركتكم
منتظرة اراء باقى الاعضاء

بجد انا قولت رأى من غير تعصب
وانا مش اشد المؤيدين لحرية المرأة وانها تاخد حقها الطبيعى اللى محدش بيجبى عليها بيه
بس برضو ماننكرش ان فى بنات واخده حريتها كويس جدا
وعلى فكرة انا مش بسهر برا البيت ل 1 او 2 لانى مش بحب ده
ومش شرط انى اكون بسهر ل1 و2 علشان اكون واخد حريتى
الحرية حاجات كتير احسن من السهر واكتر افادة
وميرسى مرة تانية على الموضوع والمناقشة

انا عارفه ان الحريه مش سهر بس

بس انا قولت اكتر حاجه بتحصل وموجود قدامنا بس لو على انكم واخدين حريتكم اكتر فى ادله كتييييييييير

وكمان انا قولت اننا واخدين حريتنا بس مش زيكم

الحرية شئ بيتوقف على حدود الاخلاق
وطول ما انا مش بعمل حاجة غلط انا حر والبنت نفس الامر
ومافيش بنت ممنوعة ومن انها تعمل اللى عايزاه طول ما هو فى حدود الاخلاق والعادات والتقاليد للاتنين
وياريت مثال احنا واخدين فيه حرية اكتر

بدل ما ندخل فى كلام كتير

فى امثله كتييييير ومش محتاج انى اقولها

وسورى لو رايى مش عاجبك بس ده رايى

ممكن انت تكون شايف البنت حره فى اى حاجه لكن المجتمع مش بيكون شايف كده

والفرق واضح بين مصر واى بلد تانى

ده لغايه فتره قريبه كانت البنات مش بيكملوا تعليم ودلوقتى فى نفس النظام فى مناطق كتير
ممكن انت متصدقش الكلام ده لانك متعرفش حد منهم
وغير كده فى تمييز واضح جداااااااااا

لا طبعا انا ماقصدتش وسورى لو ضايقتك
انا بس كنت بناقش لان ده هيفدنى لانى بكتب مسرحية قريبة من كده
وخلاص انا مش هناقش حضرتك تانى فى الموضوع ده

لا عادى الكلام مش بيزعل
واكيد هستفاد فى الاخر من المناقشه دى

اه طبعا و انا بناقش للفهم والاستفادة
وانا بدور على اجابات لأسئلة كتير جوايا من خلال الموضوع ده

طيب اسال الى جواك والى انت عايزة وانا هجوبك

وربنا معاك ونستفاد كلنا

انا عايز اعرف بتفكروا ازاى انكم مظلومين وفى ايه بالتحديد
يعنى ايه اكتر حاجة بتحسوا بالظلم وعدم المساواة فيها

اولا هما حاجات كتير منهم جزء كبير من الى متقال فى الموضوع

اولا الولد عند الوالدين اهم بكتير فى الخلفة الى جايبة ولد ومعهاش بنات مش مهم لكن لو العكس لاطبعا مع انى البنت ممكن ترفع راسهم لفوق لو شجعوها والولد ممكن يعمل العكس

فى التعامل فى البيت البنت شايلين همها لو عديت 20 سنة ومتقدمش حد او اتجوزت او كدة وطبعا لو عديت 30 ممكن تروح تنتحر

لكن الولد وقت ما يحب يتجوز يتجوز متفرقش ولو حتى اخد بنت من سن اولادة

وهكذا وامثلة وحاجات كتير

كويس جدا بس برضو ماننكرش ان البنت ليها حرية اختيار شريك حياتها
وماعدش الاهل بيدخلوا ويفرضو عليها العريس زى زمان
ولا ايه رايك؟

اوك ماشى انا معاك مع انى مش الكل بردوا كدة
وفى نفس الوقت ممكن هى ترضى وهما يكونوا رافضين يبقى لا بردوا لكن بياخدوا رايها على الى هما موافقين علية
واقلية الى بيتاخد رايها سواء الاهل موافقين او لا
ولا اية؟؟؟؟؟؟؟؟؟؟؟؟؟؟؟
وبعدين حاجة واحدة بس ومش كاملة كمان حريتها فيها؟؟؟؟؟
دة راى واعتقد انة قريب للى بيحصل....

ميرسى كمان مرة لمشاركاتكم الرائعة
منتظرة اراء باقى الاعضاء

» علمينا يا عذراء الناصره